Euskal Herriko Arte Garaikidearen Museoak, Artium Museoak, Mari Puri Herrero (Bilbo, 1942) eta Esther Ferrer (Donostia, 1937) protagonista dituzten bi lan dokumentalak aurkeztuko ditu datorren ostegunean, martxoak 26, 18:00etan. Lan horiek iaz museoak eta EITBk publiko berrien artean kultura garaikidearen dibulgazioan elkarlanean lan egiteko sinatu zuten lankidetza-hitzarmenaren esparruan ekoitzi dira. erresonantziak izenburua duen saileko lehenak dira bi dokumental horiek, eta bi artisten ibilbideak jorratzen dituzte, lau hamarkadatik gorako haien ekoizpena eta bakoitzak arte garaikidearen eremuan egin duen ekarpena errepasatuz. Dokumentalen aurkezpena dela eta, museoak solasaldi bat antolatu du Herrero eta Ferrerrekin, Beatriz Herráez museoko zuzendariarekin eta Elena Roseras Artxibo eta Dokumentazio Zentroko arduradunarekin, artisten lan-prozesuetara eta dokumentu-pieza horien ekoizpenera hurbiltzeko. Jarduera librea eta doakoa da, toki mugatuarekin.

Irudiak eskatu

Artium Museoak EITBrekin batera ekoiztutako bi lan dokumentalen aurkezpena egingo du ostegun honetan, martxoaren 26an, 18:00etan, Emanaldi aretoan. Joan den uztailean iragarri zen bezala, bi erakundeen arteko lankidetza-esparruaren helburua publiko berrien artean Euskal Herriko kultura garaikidea zabaltzen lagunduko duten kalitatezko ikus-entzunezko edukiak sortzea da. Orain aurkezten diren piezak museoaren eta EITBren profesionalek osatutako lantalde batek garatu ditu, eta Begira Produkzioak ekoiztetxeak ere bat egin du lantaldearekin. Gutxi gorabehera ordubeteko iraupena duten bi dokumental dira, bi artisten ibilbideak eta azken hamarkadetan arte garaikidearen panoraman egindako ekarpena modu monografikoan aztertzen dituztenak. Piezak Parisen, Madrilen eta Menagarain (Araba) filmatu dira, artisten estudioak dauden tokietan.

erresonantziak EITBk eta Artium Museoak garatzen duten lankidetza-proiektuan sartzen da, Euskal Herriko testuinguruan publiko berrien artean kultura garaikidearen dibulgazioan urrats bateratuak emateko helburuarekin, artisten lana hedatzeko plataforma gisa baliatuz eta egungo gizarteak dituen beharrei eta erronkei erantzuteko sorkuntza garaikidetik ondorioztatzen diren balioak bultzatuz. Lankidetza hori proiektua bultzatzen duten erakundeen artean partekatutako lantalde batek bultzatutako programen ekoizpenean gauzatzen da. Lehenengo ekintza bi pieza dokumental horien ekoizpena da, bi artista nabarmenen ibilbideetan oinarritutakoak: Esther Ferrer (Donostia, 1937) eta Mari Puri Herrero (Bilbo, 1942). Artista horiek ibilbide profesional luzea izan dute eta azken hamarkadetan praktika artistiko garaikideen garapenari egindako ekarpena erabakigarria izan da. Orain aurkezten diren lan dokumental horiek sareko lanaren aldeko apustua dira, eta, aldi berean, bi erakundeek euskal artisten lana ikuspegi kritiko eta historiko batetik ikusarazteko duten konpromisoa indartzen laguntzen dute.